Зеэр тиджарети

Миллетимизни янъы белялар саргъан, бизим хаберимиз ёкъ… Анда-мында бир-эки инсан дегиль де, базы ерлерде къоранта-къоранта, маалле-маалле от тиджаретинен огърашмагъа башлагъанлар! Я шу наркотик туз?! Къоркъунчлы беля!

Айды, яшларнынъ акъылы етмей, дейик!.. Я ана-бабалары Аллаhтан къоркъмай, арамдан сакъынмай, миллетининъ адыны, шерефини, озь намусыны тюшюнмейлерми?.. О, инсанлар бу къадар ахмакъмы? Бу ишлернинъ бойле къалмайджагъыны, эписининъ незарет этильгенини анъламайлармы? Бир кунь бу шейтан белясынынъ бир чокъ яшларымызны бир сипиртки иле топлап, аписханелерге алып бараджагъыны, янъы несилимизге пис леке ураджагъыны тюшюнмейлерми?!

Бу къыйын вакъытта шу фитне туджджарлары «къолай пара» деп нидже яшларымызны зеэрлейджеклер?! Бу белягъа эли былашкъан инсанлар бундан вазгечмез исе, тек озюне дегиль, миллетине буюк зарар береджеклер! Чюнки олар бир ченгельге тутылды, о ченгельнинъ уджунда да зеэр ве тюрьме бардыр!

Эй, ана-бабалар, даа эртедже экенде эвлятларынъызны бу олюм белясындан къуртарынъыз! Чюнки зеэр тиджарети веба, эбола вирусы киби къоркъунчлы бир хасталыкътыр ве бу хасталыкъ джемаатны ичтен чюрютир. Бу оттан башлап инеден биткен бир ёлдыр. Эм де бирисининъ эвлядыны зеэрлеп къазангъанынъыз парадан хайыр кореджексинъизми? Сонъ башынъызгъа кельген къаза-белялар «къайдан кельди» деп сораманъыз. Эсинъизни топланъыз!

Биз бутюн миллетимизнен берабер бу белягъа къаршы курешмек керекмиз!

Мухаммед Али Сулейманов

Источник